اتبعي الخطوات دي
1-ناديها بماما ومش من تحت الدرس
حسيسيها فعلا انها كده وعامليها علي انها امك وكلمهه ماما دي بجد ليها تأثير ساحر فيها
2-حسسي جوزك باهميتها عندك يعني اسألي عنها بالتيليفون روحي زوريها لما تخرجي مع جوزك اختاري هديه وقوليله ايه رأيك في دي لماما
صدقيني هو هيفرح جدا بده وهيعمل كده مع اهلك
3-لو سمعتي صوتها حتي لو في التيليفون افرحي وحسيسيها بده ونبرات الصوت بتتنقل خلال التيليفون
يا سلام لو قلتلها اذيك يا قمر او قلتلها مش هتيجي ياماما بقي البيت بقاله كتير منورش هتعمل شغل جامد
4-لو رحتي عندها حسيسيها انك مش غريبه ومتخليهاش تتكلف ولو كانت بتعمل اي حاجه بسرعه اعمليها بدلها وصممي مش عزومه مركبيه بلاش فضايح
5-حسسيها باعجابك بكلامها واكلها اعملي فيها منبهره واطلبي منها تعلمك اكله من اكلها حتي لو انت بتعرفي تعمليها استعبطي هي هتفرح وهتحس انها بتعلم بنتها مش مرات ابنها
####
6-اطلبي رأيها في بعض الحاجات واعملي انك معجبه برأيها واحترميه حتي لو مش هتنفذيه خليكي ناصحه بس اوعي تدخليها في خلافاتك مع جوزك لانها هتيجي علي دماغك في الاخر
7-اوعي تجادليها حتي لو معجبكيش رأيها ابتسمي
وغيري الموضوع
8-متنسيش تعزميها كل فتره عل الغدا واعملي الاكله ال علمتهالك وفكريها بده هتفرح اوي واسألي ابنها عن الاكل ال بتحبه واعمليه وهو هينشكح اوي انك مهتمه بيه
9-لو جت عندك افرحي بيها ومتحسسيهاش انها غريبه قوليلها ده بيتك وبيت ابنك وامسكي فيها ومتضيقيش لانها طبعا هتدخل المطبخ وهتصر تعرف ال فيه وهتكشف الحلل وهتفتح التلاجه معلش اعصري علي نفسك لمونه وعديها معلش انت الكبيره
-حاولي تفتكريها بالهدايا ولو خرجت معاكوا قدميها قدامك وامسكي ايديها لما تركب العربيه ولما تنزل منها ولما تركب العربه معاكو معلش خليها تركب جنب ابنها
عوزاكي تفتكري حاجه متنسيش ان ده ابنها ال تعبت في تربيته والاخر انت جيتي اخدتيه علي الجاهز
متتكلميش عانها من وراها باسلوب وحش اكيد متحبيش جوزك يعمل مع اهلك كده
متنسيش ان في وم هتبقي في موقفها ومتحبيش مرات ابنك تعاملك باسلوب وحش
كده هتثبيتيها وتحبك واكيد هتنكسف
وتخلي عندها دم وتعاملك كويس لو الكلام ده محوقش معاها يبقي ربنا يكون في عونك توكلي علي الله وولعي فيها
يا جماعه انا بهظر
