السلام عليكم ورحمة الله وبركاته
عايز اسال سؤال لكل عضو ليه بنتوب وبنرجع تاني ؟ وليه ربنا صابر علينا مع ان في ناس بتعمل ........... ليه بيصبر علينا مع انه ادانا فرصه قبل كده وفي اللي اخد اكتر من فرصه وفي اللي مش فاكر عدد الفرص من كترها مين مننا محصلوش موقف سكت فجاه وحس وكان متاكد ان الموقف ده رساله من ربنا ؟!!!!! فاكر الموقف الفولاني اللي قولت جواك سبحان الله ازاي ده حصل طيب فاكر اليوم الفولاني اللي قولت فيه خلاص يارب انا تايب ومش هغلط تاني وبعد كام شهر رجعت تاني ؟!!!!!
اقولك ليه صبر علينا اصله بيحبنااه بيحبنا وهقولك الدليل
فكر في نعم ربنا عليك شوف انت من يوم ما اتولدت وانت الحمد لله بتتحرك وعندك عقل وعنين واذنين ويديين وارجل وغير كده كل شخص بيتنفس تلقائي اغلب البشر ميحسوش
بالحجات دي لانها عندهم ومتحرموش منها لكن فكر كده لو لقدر الله ربنا اخد منك حاجه من دي هتقدر تكمل ؟ هاتستحمل ؟ ولا...... شوف بقي هو بيحبك اد ايه وصابر عليك ومع كده انت غلطت اد ايه ؟ ميصبرش يا جماعه الا اللي بيحب
في حياة كل شخص في ناس ليهم مكانه خاصه وفي طبعا اختلاف شخصيات وفي ناس صح وناس غلط ممكن انت تكون صح بنسبة 100%100 وشخص عزيز عليك بيغلط في حقك وانت ساكت مع انك مش ضعيف وممكن تاخد حقك لكن صابر ليه ؟ عشان بتحبه صح ؟
حجات لو عملناها ان شاء الله هانتقبل هانتقبل
اهم شئ حسن الظن بالله كتير الواحد بيتوب وبعد فتره بيحس ان همته قلت ويبدا الشيطان يقوله انت كدا مش مقبول ويبدا يقدم الحجه علي هذا المنطق ويقول للشخص التائب منت لو مقبول ليه مش حاسس انك قريب من ربنا وليه مش مرتاح (القلب بيحتاج وقت عشان يتنقي الموضوع موضوع وقت وفي نفس الوقت اختبار من الله عايز يشوفك فعلا انت تائب صادق ولا ....... )
لكن صدقوني لو الواحد قال يارب من النهارده مفيش في حياتي غيرك وفعلا مكنش في حد في حياته غير ربنا هيتقبل هيتقبل
(من النهارده مش هبطل ذكر لله حتي الممات من اول اليوم لاخرة ذاكر لله وانا في البيت وانا في العمل وانا في الشارع وانا في التمرين وانا بذاكر وانا قاعد علي الكمبيوتر في كل وقت وفي كل حال انا ذاكر لله من النهارده هبطل المعاصي كذا كذا اللي انت سترتهم عليا سنين يارب مش عشان الناس ولا حتي عشان نفسي لكن عشانك انت يارب وعشان لما اقابل الرسول صلي الله عليه وسلم يوم القيامه يبتسم في وجهي ويقربني اليه
اللهم اجعلنا من عبادك الذين يقربهم الرسول اليه يوم القيامه
(الذكر اسهل عباده وافضل عباده تعينك علي الطاعه وخلي ليك قدر معين من القرآن الكريم للقراءه كل يوم جزء مثلا الجزء مش هياخد اكتر من 20 دقيقة )
من النهارده انا ليا اسرار كتير مع ربنا انا صائم اثنين وخميس لله من غير ما حد يعرف حتي اقرب الناس ليا وهصوم 13 و14 و15 من كل شهر عربي وكمان ذاكر لله في الخفاء والعلن وجميع اعمال الخير ليك انت بس يارب لو ده حصل ان شاء هنتقبل
ولازم يا جماعه البدايه تكون صح وسهلة اهم شئ الفروض والقرآن وذكر الله في ناس كتير بتبدا غلط وطبعا مبتقدرش تكمل
وعايز اسال الاعضاء المقصريين في الصلاة مين اكتر شخص بتحبه في حياتك الخاصه ؟ تخيل ان الشخص ده عايز يشوفك 5 مرات في اليوم هتروح ولا لا
طبعا هروح طيب الشخص ده عايز تشوفه ليه (الرد بحبه وبحب اتكلم معاه) هل الشخص ده قدملك حاجه تستاهل الحب ده ؟ الاجابه هتكون اه او لا هنعتبر انه قدملك حجات لا تعد ولا تحصي هل الحجات دي زي نعم ربنا عليك ؟طبعا هانقول لا طيب يبقي ازاي لما ربنا يعوز يقابلك متروحش ولما الانسان اللي مهما عمل مش هديك اللي ربنا ادهولك تروح تقابله ؟!!!!!!!!!!!!!! حاجه تكسف صح ؟ طيب عايز اقولك مفاجأه الانسان اللي انت بتحبه ده ربنا هو اللي رزقك بيه وهو اللي خلاه يحبك ويعملك الحجات الي خلتك تحب هذا الشخص
شوفت بقي ربنا بيحبك اد ايه وانت مقصر اد ايه ؟!!!!!!!
