حقيقة ساره اللي قلبت فيسبوك وتويتر !

الأسبوع ده الفيس بوك وتويتر إتقلبوا عشان خاطر “سارة” ! يا ترى مين ساره ؟ وإيه حكايتها ؟ وليه كل ده ؟ كملوا قرايه وهتعرفوا كل الكلام ده ..
البداية ..
حكاية سارة بدايتها كانت مكالمة من بنت اسمها سارة لأسامة منير فى برنامج أنا والنجوم وهواك وقعدت تحكيله عن أنها متجوزة عن حب لمدة 4 سنين وقالت ان حكايتها مختلفة عن كل الحكايات بدأت بحكايتها مع أخواتها اللى أشتغلت كل حاجة وحتى الحرام عشانهم مع انها كانت طالبة كلية اعلام بس بعد كده قررت أنها تبعد عن الشغل ده وباعت مناديل فى الاشارات لحد ما جوزت أخوتها وبعد كده أتجوزت وبدأت تحكيله عن جوزها اللى بيشرب سجاير ومخدرات وبيضربها وكمان هى اللى بتصرف على البيت وعلى عيلتها، بس وطبعا أسامة أداها نصايحه..
بداية الحفله ..
الحفلة بدأت على فيسبوك وتويتر بعد المكالمه علطول، بدأت تعليقات وبوستات وتويتات كتير أوي عن موضوع ساره وتريقه كتير أوي .. وكان فى ناس كتير أوى مش فاهمة هى مين سارة ديه بس عجبهم الألش، ومن أكتر التعليقات والصور اللى كانت على سارة..
صورة واحد حاطت صورته جوه وردة وبيقول عشانك يا سارة
واللى قتل صاحبه واللى ركب صاروخ كورى واللى قطع رجله وكل ده فداكى يا سارة
واللى غاوى خسارة عشانك يا سارة
لأ ومش بس كده كمان عملوا أغنية لسارة بتقول بحبك يا سارة حب الاسمنت للشكارة بحبك يا سارة حب الريموت للحجارة بحبك يا سارة حب البواب للعمارة بحبك يا سارة حب السمك للظفارة..
وطبعا سارة دخلت فى السياسة زى كل حاجة فى حياتنا دلوقتى فى يوم إعادة محاكمة مبارك حطوا صورة القاضى وهو بيقول أنا أتنحيت عشانك يا سارة، وحاجات من ديه كتير أوى..
وكده نكون حكينالكم موضوع ساره كله من الأول للآخر .. ايه رأيك فى النوع ده من الألش ؟

4200